مطعم شاورمر جدة
اليوم حبيت اجرب شاورمر وهادي اول مرا اجربو الصراحه مرا جيد بس حتكلم عن حاجات
، طلباتنا كانت
( شطشويش – نحيفات – بطاطس حارة – بطاطس بالطحينه ودبس الرمان – ساندويتش شاورما دجاج )
حبدا اول شي بالمقبلات.. بطاطس حارة : 14 ريال
الكميه تعتبر كافيه لشخصين او تلاته حسب الاطباق الجانبيه
كانت لذيذه ودافيه وفيها نكهه حارة بسيطه وكزبرة و شاورما قلليلا جدا
نكهتها متناغمه وتدوب في الفم واديها 10/9
بطاطس بالطحينه ودبس الرمان : 14 ريال
للاسف ماعجبتنا ، نكهه الطحينه طغت على دبس الرمان
والبطاطس وصلت بارده ولاصقه في بعض متكتله
والكزبرة ذبلانه ولو كانت فرش كان احسن 10/4
نحيفات : 12 ريال
نوع من انواع المقبلات ثلاث شاورمات جدا نحيفات
الشاورما الوحده مافي غير صوص الثوم وشوية شاورما دجاج فقط
كان ممكن تكون احسن لو حطو اضافات
زي المخلل والخس والبطاطس وزادو الدجاج 10/6
ساندويش شاورما دجاج : 5 ريال
زي اي ساندوش شاورما ، كانت لذيذه والثوم كان كريمي مرا مو ثقيل ومو مرا مثوم
كان حيكون الذ لو برضو زادو الدجاج لانو كان قليل مرا
دا ممكن يكون عيبهم في المطعم اديها 10/7
الشطشويش : 12 ريال
كان كبير بس السعر شوية مبالغ لساندوش شاورما
كان جوتو صوص تومنار (توم حار ) والهالبينو
كميه الدجاج فيه كويسه احسن من الي قبلها ووصل حار ولذيذ
عيبو انو الصوص كان زايد وسعرو فقط 10/8
المطعم اتاخر شوية وبعض الطلبات حارة واغلبها بارده وبعضها مليانه صوص
وبعضها ناقص مرا وبعضها فيها دجاج واغلبها لا
حسيت انو لو يبغالو تزبيطات خفيفه ويركز على الاغلاط
وياخدوها بصدر رحب حيسير المركز الاول
ومتاكده انهم حيتحسنو ،وفي السعر حسيت في حاجات شوية لازم يركزو في سعرها
زي الشطشويش والنحيفات . النحيفات شي خفيف مافيها شي
مع تعديل للاضافات حتتحسن
الفرع في السلامه بجده
جميع الحقوق محفوظة لموقع كافيهات و مطاعم السعودية © 2024 - Privacy Policy - اعلن معنا
